JEDDAH, Saudi Arabia — Patay ang isang Overseas Filipino Worker (OFW) matapos matagpuang duguan at tadtad ng saksak sa kanyang tinutuluyan noong Enero 2, 2026.
Image Credit to Raffy Tulfo In Action
Kinilala ang biktima na si Joseph John Gacusan, 27, na nagtatrabaho sa Jeddah. Ayon sa ulat, ang kanyang kasintahan na si Maryjoy Cabubas, na isa ring OFW, ang unang nagbigay ng impormasyon sa pamilya na natagpuan umano niya ang biktima sa naturang kalagayan.
Noong Enero 21, lumapit sa programang Raffy Tulfo in Action ang mga magulang ng biktima na sina Eliza at Juanito Gacusan upang humingi ng tulong sa imbestigasyon. Sa panahong iyon, sinabi ng manpower agency na GBMLT Manpower Services Inc. na patuloy pa ang imbestigasyon ng mga awtoridad sa Jeddah at wala pang natutukoy na suspek.
Gayunman, naghinala ang pamilya sa kasintahan ng biktima matapos umano nilang mabasa ang mga mensaheng naglalaman ng pagbabanta.
Sa pakikipag-ugnayan ni Senador Raffy Tulfo sa Department of Migrant Workers (DMW), nangako si DMW Secretary Hans Leo Cacdac na tututukan ang kaso at maglalaan ng legal na tulong sa pamamagitan ng Labor Attaché upang mapabilis ang imbestigasyon.
Noong Marso 6, muling humarap sa programa ang ina ng biktima at kinumpirma na si Cabubas ang pangunahing suspek sa krimen, taliwas sa naunang pahayag na suicide ang insidente.
Batay sa memorandum ng DMW na inilabas noong Pebrero 15, si Cabubas ang itinuturong responsable sa pagkamatay ng biktima at kasalukuyang nakakulong sa Jeddah.
Isang testigo na kinilalang “John,” na umano’y kaibigan ng suspek, ang lumutang at nagsabing inamin ng suspek ang krimen at ipinakitang pinagsasaksak ang biktima bago ito pinalabas na pagpapakamatay. Nagpadala rin umano ang suspek ng larawan ng ginamit na armas.
Image Credit to Raffy Tulfo In Action
Image Credit to Raffy Tulfo In Action
Ayon kay DMW Undersecretary Bernard Olalia, isa sa tinitingnang motibo ng krimen ang umano’y pagtanggi ng biktima na makipagbalikan sa suspek.
Samantala, tiniyak ng DMW na ipagkakaloob sa pamilya ng biktima ang kaukulang benepisyo at tulong pinansyal habang patuloy ang imbestigasyon ng mga awtoridad sa Saudi Arabia.
