Nagpunta sa National Bureau of Investigation (NBI) ang ilang overseas Filipino workers (OFWs) upang ireklamo ang isang courier service sa Makati na nabigong maihatid ang kanilang mga balikbayan box sa takdang oras.
Sa ulat ni John Consulta para sa GMA News 24 Oras, sinabing sinamahan ang mga reklamadong OFW ng mga tauhan mula sa Bureau of Customs (BoC) at Department of Migrant Workers (DMW) upang magsampa ng formal na reklamo laban sa nasabing kumpanya.
Ayon sa mga OFW, ilang buwan hanggang higit isang taon nang delayed ang kanilang mga ipinadalang kahon. May ilan pang mas nauna nang nakauwi sa Pilipinas kaysa sa balikbayan box na kanilang ipinadala.
Si “Hans,” isa sa nagreklamo, ay nangangamba na baka expired na ang ilang laman ng kanyang dalawang kahon. Samantala, si “Leah” ay nagsabing siyam na kahon ang ipinadala niya pa noong 2024—ngunit hanggang ngayon ay wala pa rin.
“Bakit hanggang ngayon wala? Talagang disappointed ang lahat ng OFW,” sabi ni Hans.
“Masakit sir… ang dami noon, tapos until now hindi pa namin makuha,” ayon kay Leah.
Ayon sa BoC, tinatayang 10,000 Pilipino ang apektado dahil sa libo-libong balikbayan boxes na naiwan sa mahigit 100 containers na umano’y pinabayaan ng naturang courier service.
Nakahanda ang BoC at DMW na tulungan ang mga OFW na magsampa ng kaso.
“Gusto nilang mag-file ng large-scale estafa in relation to economic sabotage. Matagal na ang ganitong practice, kaya sa tulong ng NBI, naniniwala kaming mabibigyan ito ng agarang aksiyon,” pahayag ni Deputy BOC Commissioner Michael Fermin.
Nagsumite na ng salaysay ang mga OFW sa NBI, na agad magsisimula ng imbestigasyon.
“Priority natin ito. I-assign natin agad sa isa o dalawang unit para masimulan ang statement taking,” ayon kay NBI Director Lito Magno.
Wala pang opisyal na pahayag ang nasabing courier company.
Panoorin ang video
