Tiniyak ng Department of Migrant Workers (DMW) ang agarang tulong at suporta sa pamilya ng dalawang Overseas Filipino Workers (OFWs) na nasawi matapos pagbabarilin ng kanilang employer sa isang hostage incident sa Beirut, Lebanon noong Abril 15, 2026.
Ayon sa ulat, ang dalawang biktima ay matagal nang nagtatrabaho bilang household service workers sa nasabing tahanan. Nasawi ang mga ito matapos barilin sa gitna ng insidente. Agad namang naaresto ang employer at kasalukuyang nasa kustodiya ng pulisya habang inihahanda ang pormal na pagsasampa ng kaso laban dito.
Related Story : 2 Filipina Workers K!lled in Lebanon, Dipolog Family Seeks Justice
Sa direktiba ni Hans Leo J. Cacdac, personal na bibisita ang DMW Undersecretaries na sina Bernard P. Olalia at Felicitas Q. Bay sa pamilya ng mga biktima upang ipahatid ang pakikiramay at tiyakin ang buong suporta ng pamahalaan.
Samantala, patuloy ang koordinasyon ng Migrant Workers Office (MWO) at ng Philippine Embassy in Lebanon sa mga lokal na awtoridad upang masiguro ang masusing imbestigasyon at ang agarang pagsasampa ng nararapat na kaso laban sa suspek.
Binigyang-diin ng pamahalaan ng Pilipinas ang matibay nitong paninindigan na makamit ang hustisya para sa mga biktima, kasabay ng tuloy-tuloy na pagbibigay ng tulong sa kanilang mga pamilya, kabilang ang repatriation at pag-access sa mga benepisyo.
